angusam 20/11/2015

குளித்தலை அருகே பள்ளிக்கு செல்வதாக கூறிச்சென்ற மாணவிகள் 5 பேர் மாயமாகினர். இது குறித்து போலீசார் விசாரணை நடத்தி வருகின்றனர்.

மாணவிகள் மாயம்

கரூர் மாவட்டம், குளித்தலை அருகே உள்ள இரும்பூதிபட்டியில் இலங்கை அகதிகள் முகாம் உள்ளது. இந்த முகாமை சேர்ந்தவர்கள் ருதேனி(வயது 16), திஷாந்தினி(16), நிவேதா(16), சரசுவதி(16). இவர்கள் 4 பேரும் குளித்தலை அரசு பெண்கள் மேல்நிலைப்பள்ளியில் பிளஸ்-1 வகுப்பு படித்து வந்தனர். இதேபோல் இரும்பூதிபட்டியை சேர்ந்த பிரபா(17) என்ற மாணவி அய்யர்மலை அரசு மேல்நிலைப்பள்ளியில் பிளஸ்-2 படித்து வந்தார். இவர்கள் 5 பேரும் தோழிகள் ஆவர். இவர்கள் 5 பேரும் பள்ளிக்கு செல்வதற்காக இரும்பூதிபட்டியில் உள்ள பஸ் நிறுத்தத்தில் இருந்து நேற்று காலை பஸ்சில் ஏறிச்சென்றனர்.

பின்னர் மாலையில் அவர்கள் 5 பேரும் தங்களுடைய வீட்டுக்கு திரும்பி வரவில்லை. இதனால் அவர்களுடைய பெற்றோர்கள், பள்ளிகளின் நிர்வாகத்தை தொடர்பு கொண்டு கேட்டபோது, அவர்கள் பள்ளிக்கு செல்லவில்லை என்று கூறப்பட்டுள்ளது. போலீசார் விசாரணை இதனால் அதிர்ச்சியடைந்த பெற்றோர்கள் இது குறித்து குளித்தலை போலீசில் புகார் செய்தனர். அதன்பேரில் போலீசார் விசாரணை நடத்தி வருகின்றனர். இந்த சம்பவம் அந்த பகுதியில் பரபரப்பை ஏற்படுத்தி உள்ளது.

Leave a comment.

Your email address will not be published. Required fields are marked*