ஓய்வறியாது உழைத்த திருச்சியின் முகமாகத் திகழ்ந்த நந்தலாலா !

திருச்சியின் முகம் கவிஞர் நந்தலாலா – நினைவேந்தல்

புதுக்கோட்டை மாவட்டம் குன்றாண்டார் கோவில் எனும் சிற்றூரில் பிறந்த நெடுஞ்செழியன் என்னும் இளைஞர் நந்தலாலா என்கிற புனைப்பெயரில் கவிதைகள் எழுதத்துவங்கினார். இந்தியன் வங்கி ஊழியராகப் பணியாற்றிக்கொண்டே தமிழ்நாடு முற்போக்கு எழுத்தாளர் சங்கத்தில் தன்னை இணைத்துக் கொண்டு கடந்த நாற்பதாண்டுகளுக்கு மேலாகத் தீவிரமாக இயங்கி வந்தார். நாகப்பட்டினத்தில் அவர் பணியாற்றிய காலத்தில் நாகை கலை இரவை மிகப்பிரம்மாண்டமாக நடத்திக்காட்டியதில் பெரும்பங்காற்றினார். திருச்சிக்கு மாற்றலாகி வந்த பிறகு திருச்சியிலும் அருகமை மாவட்டங்களிலும் தமுஎகசவை உருவாக்குவதிலும் வழிநடத்துவதிலும் அவரது பங்கு தலையாயது.

சோலைக்குயில்கள் என்கிற இலக்கிய இதழை திருச்சி தோழர்களுடன் இணைந்து நடத்தி வந்தார். தமிழ்நாட்டின் மூலைமுடுக்கெல்லாம் சென்று திறந்தவெளிக்கூட்டங்களில் பல்லாயிரக்கணக்கான மக்களிடம் பேசி வந்தார். அவர் பேசாத மேடை இல்லை, கால் படாத மாவட்டம் இல்லை. அவருடைய அறிவார்ந்த, அங்கதம் மிகுந்த உரைகளுக்கென பல்லாயிரக்கணக்கான ரசிகர்கள் தமிழகத்திலும் உலகின் பலநாடுகளிலும் உண்டு. இலக்கிய தளத்தில் உடனிருக்கும் அனைவரையும் நண்பராக ஏற்று அன்பு பாராட்டுவார். தமிழ்நாடு முழுக்க கூட்டங்களுக்குப் பயணம் செய்யும் நந்தலாலா திருச்சியில் இருக்கும் வேளைகளில், உள்ளூர் நிகழ்ச்சிகளில் அழைப்பேரில் கலந்துகொள்வார். சில வேளைகளில் கூட்ட நிகழ்வைப் பார்த்து அழைப்பில்லாமலும் நிகழ்வுகளில் கலந்துகொண்டு, கூட்டம் நடத்துபவர்களை ஆச்சரியத்தில் ஆழ்த்துவார் என்பது யாவருக்கும் கைவரபெறாத பண்பாகும்.

2018இல் கல்லூரிப் பணியிலிருந்து ஓய்வு பெற்ற பிறகு, நம்ம திருச்சி, என் திருச்சி ஆகிய வார இதழ்களில் கட்டுரைகள் எழுதி பணியாற்றிக் கொண்டிருந்தேன். நான் எழுதிய காதில் விழுந்த திருச்சி வரலாறு என்னும் தொடரைப் படித்துவிட்டு, இதழ் ஆசிரியர் ஜெடிஆர் அவர்களிடம் தொடர் குறித்து பாராட்டு தெரிவித்திருந்தார்.

அகில இந்திய ஜனநாயக மாதர் சங்கத்தின் தலைவர் பாப்பா உமாநாத் குறித்து ஒரு கட்டுரை எழுதியிருந்தேன். தலைப்பு “திருச்சியின் புரட்சித்தலைவி” என்று தலைப்பிட்டு, சிறு தலைப்பில், “ஜெயலலிதா சொல்வது பொய்” என்று அந்தக் கட்டுரை வெளிவந்திருந்தது. இதைப் படித்துவிட்டு, தொடர் எழுதிய என்னை ஒரு விழாவில் நந்தலாலா சந்தித்தார். அப்போது,“விகடன் இணையத்தில் நான் எழுதும் ஊறும் வரலாறு தொடர் படித்திருக்கின்றீர்களா?” என்று கேட்டார். “இல்லை என்றேன்” தொடர்ந்து அவர்,“நானும் பாப்பா உமாநாத் குறித்து கட்டுரை எழுதியிருக்கிறேன்.

உங்கள் கட்டுரையில் உள்ள எழுத்துகளில் உள்ள இரசனை மிகுந்த வரிகளைப் படித்து வியந்தேன்” என்றார். தொடர்ந்து எந்த இலக்கியக் கூட்டங்களில் ஆர்ப்பாட்டங்களில் சந்தித்தாலும் பேராசிரியர் என்றே விளிப்பார். ஒருமுறை “உங்களுக்கும் எனக்கும் ஒரு ஒற்றுமைம உள்ளது என்ன தெரியுமா? என் இயற்பெயர் எஸ்.நெடுஞ்செழியன்” என்று என்னை வியப்பில் ஆழ்த்தினார்.

2024ஆம் ஆண்டு ஜூலை மாதம் பெரியார் பிறந்தநாள் விழாவை விடுபாடுகள் இல்லாமல் 3 ஆண்டுகளும் கொண்டாடப்பட வேண்டும் என்று பாரதிதாசன் பல்கலைக்கழகத்திற்கு வேண்டுகோள் விடுத்து ஒரு போராட்டத்தை நடத்திக் கொண்டிருந்தேன். அந்தப் போராட்டத்தின் ஒவ்வொரு அசைவையும் நந்தலாலாவிடம் புலனம் வழி செய்திகள் தெரிவிப்பேன். பின்னிருந்து நந்தலாலா என்னை இயக்கிக் கொண்டிருந்தார். மேலும் அவர்,“இறுதியில் நானும் கோவனும் வருவோம். அதற்கு அவசியம் இல்லாமல் நீங்களே இப் போராட்டத்தில் வெற்றிபெறுவீர்கள்” என்றும் வாழ்த்தினார்.

அதுபோலவே பெரியார் மீது பற்று கொண்ட தோழர்களின் முயற்சியால் அந்தப் போராட்டத்தில் வெற்றிப்பெற்றோம். செய்தி அறிந்து அலைபேசியில் உரையாடும்போது,“நாங்கள் வந்திருந்தால் எங்களால்தான் இந்தப் போராட்டம் வெற்றி பெற்றது என்று செய்திகள் வெளியிடப்படும். எங்களைப் போலவே போராட அடுத்ததலைமுறை உள்ளது என்பதைத்தான் இந்தப் போராட்டம் வெளிப்படுத்தியிருக்கிறது” என்று சொல்லி எம்மை நெகிழச் செய்தார்.

2024 ஜூலை மாதம் முதல் அங்குசம் சமூக நல அறக்கட்டளையின் சார்பில் ‘யாவரும் கேளீர்’ என்னும் தமிழியல் பொதுமேடை நிகழ்வை மாதம் இருமுறை (2ஆம் சனி, 4ஆம் சனி) நடத்தினோம். அப்போது நந்தலாலா என்னைச் சந்தித்தபோது,“ஜெடிஆரிடம் பேசிவிட்டேன். ஒரு நிகழ்வில் என்னையும் பயன்படுத்திக் கொள்ளுங்கள்” என்று தோழமையோடு கூறியது என்னை வியப்பின் உச்சத்திற்கு இட்டுச் சென்றது.

தமிழகம் அறிந்த நாவன்மைமிக்க பேச்சாளர் இத்தனை எளிமையாக இருப்பது என்பது என்னை வியப்பில் ஆழ்த்தியது. 2024 ஆகஸ்ட்டு மாதத்தில், ஐயா…. நீங்கள் 2024 டிசம்பர் 28ஆம் நாள் தந்தை பெரியாரின் 50ஆம் ஆண்டு நினைவு நாள் தொடர்பாக “பெரியார் போற்றுதும்… பெரியார் போற்றுதும்” என்ற பொருண்மையில் உரையாற்ற வேண்டும்” என்ற எங்களின் வேண்டுகோளை ஏற்றார். நிகழ்வின்போது களம் அமைப்பின் கூட்டம் முடிந்து யாவரும் கேளீர் நிகழ்வுக்கு இரவு 7.00 மணிக்கு வருகை தந்து, பெரியாரை நாம் எப்படி புரிந்துகொள்ளவேண்டும்…. அவரை நாம் ஏன் போற்றவேண்டும்” என்று 60 நிமிடங்கள் உரையாற்றினார். அறிவார்ந்த நந்தலாலாவின் உரையை அரங்கம் கேட்டு புதிய சிந்தனை பெற்று மகிழ்ந்தது.

நிகழ்வு முடிந்து பிளாசம் விடுதியின் கீழ் வைத்திருந்த ஸ்கூட்டியை எடுக்கவேண்டும் என்னையும் அழைத்தார். நிகழ்வில் வழங்கப்பட்ட நூல்கள், பயனடைகள் எல்லாவற்றையும் எடுத்துக்கொண்டு அவரோடு சென்றேன். நாடாறிந்த பேச்சாளர் நந்தலாலா,“பேராசிரியர் நிகழ்வுக்குச் சிறப்பாக இருந்தது. காலத்தால் அழியா வண்ணம் வீடியோ பதிவு வேறு செய்திருக்கின்றீர்கள். யூடியூபில் பதிவேற்றம் வேறு செய்ய இருக்கின்றீர்கள். உங்களுக்கும் ஜெடிஆருக்கும் என் நன்றி. நவீன தொழில்நுட்பத்தை இப்படித்தான் நம் சிறப்பாக பயன்படுத்தவேண்டும். சரி பேராசிரியர் என் உரை எப்படி இருந்தது? உங்களின் எதிர்பார்ப்பை நிறைவேற்றினேனா?” என்று குழந்தை மனத்தோடு என் பதிலுக்காகக் காத்திருந்தார். நந்தலாலாவின் உரை எனக்கு மட்டுமல்ல, எல்லாருக்கும் நிறைவான உரை” என்றேன். பரிசு பொருள்களை ஸ்கூட்டியில் வைத்துவிட்டு, என் கரங்களைப் பற்றி, மகிழ்ச்சியோடு குலுக்கிவிட்டு, “நெஞ்சம் நிறைய மகிழ்ச்சியோடு விடைபெறுகிறேன்” என்று வாகனத்தை இயக்கி சென்றார்.

மகிழ்ச்சியோடு விடைபெறுகிறேன் என்றபோது எங்களிடமிருந்துதான் விடைபெறுகின்றீர்கள் என்று நாங்களும் விடை கொடுத்தோம். இரு மாதங்கள் கழிந்த நிலையில் எங்களைவிட்டு நிரந்தரமாக விடைபெற்றுவிட்டீர்கள் என்ற செய்தி எங்கள் செவிகளில் விழுந்தபோது, தேன் கொட்டிய செவிகளில், தேள் கொட்டியதுபோல் துடித்துப்போனோம். கர்நாடாக மாநிலம் பெங்களூரில் உள்ள மருத்துமனையில் இறுதி மூச்சு அடங்கியது என்ற செய்தியும் எங்களைச் சோகத்தில் ஆழ்த்தியது. எழுத்து, பேச்சு, செயல்பாடுகள் என ஓய்வறியாது உழைத்த திருச்சியின் முகமாகத் திகழ்ந்த நந்தலாலா இப்போது நிரந்தரமாக ஓய்வெடுத்துள்ளார் என்றே எண்ணுகிறோம். எங்களின் செயல்பாடுகளில் உங்களைப் பின்பற்றுவோம். உங்கள் உடலுக்கு அழிவிருக்கலாம். செயல்களால் நந்தலாலா எப்போதும் எங்களோடு வாழ்ந்துகொண்டே இருப்பார். அன்பு தோழருக்கு நம் வீரவணக்கம்.

-ஆதவன்

@@@

தமிழக முதல்வர் மு.க. ஸ்டாலின்

இந்நிலையில் கவிஞர் நந்தலாலா மறைவுக்கு தமிழக முதல்வர் மு.க. ஸ்டாலின் இரங்கல் தெரிவித்துள்ளார். இது தொடர்பாக அவர் வெளியிட்டுள்ள இரங்கல் செய்தியில், “தமிழ்நாடு முற்போக்கு எழுத்தாளர்கள் கலைஞர் சங்கத்தின் துணைத் தலைவரும் தமிழ்நாடு இயல் இசை நாடக மன்றத்தின் பொதுக்குழு உறுப்பினருமான கவிஞர் நந்தலாலா மறைந்த செய்தி அறிந்து மிகவும் வருத்தமுற்றேன்.தமிழ்நாட்டின் புத்தகத் திருவிழாக்கள், முற்போக்கு மேடைகள், தொலைக்காட்சி விவாதங்கள், பட்டிமன்றங்கள் எனக் கவிஞர் நந்தலாலாவின் குரல் ஒலிக்காத மேடையே இல்லை எனும் அளவுக்கு அனைத்து உணர்ச்சிகளையும், அரிய தகவல்களையும் தமது பேச்சில் வெளிப்படுத்தும் திறம் பெற்றவர் அவர்.

காவிரிக்கரையின் மைந்தனான கவிஞர் நந்தலாலா தமது ஊரான திருச்சியின் மீது கொண்ட தீராக்காதலுக்கு, ‘திருச்சிராப்பள்ளி: ஊறும் வரலாறு’ நூலே சான்றாகும். அவரது ஆற்றல் தமிழ்ச் சமூகத்துக்கு மேலும் பயனளிக்க வேண்டும் என்று கடந்த ஆண்டு, தமிழ்நாடு இயல் இசை நாடக மன்றத்தின் பொதுக்குழு உறுப்பினராகவும் அவரை நியமித்திருந்தோம் என்பது குறிப்பிடத்தக்கது. தந்தை பெரியார் மீது பெரும் பற்றும், பேரறிஞர் அண்ணா மீது பெருமதிப்பும், கலைஞர் மீது மிகுந்த அன்பும் கொண்டிருந்தவர் கவிஞர் நந்தலாலா. கலைஞர் குறித்து, ‘தாம் வாழ்ந்த காலம் முழுதும், மானமும் அறிவும்: துணிச்சலும் செயலுமாக வாழ்ந்தவர் கலைஞர். உரிமை மீட்புப் போரில் அவரே நமக்கு என்றும் போர்வாள்’ என்று உண்மை இதழில் அவர் எழுதிய சொற்களை மறக்க முடியாது.

@@@

அமைச்சர் அன்பில் மகேஸ்

@@@

சேவை கோவிந்தராஜ் 

நட்பாய் அன்பாய் பழகி எல்லோரையும் ஈர்க்கக் கூடியவர் என்னையும் ஈர்த்தவர். அன்பிற்கினிய நண்பர் நந்தலாலா அவர்களுக்கு  எங்கள் திருச்சி மாவட்டநலநிதிகுழுவின் உறுப்பினருக்கு புகழஞ்சலி ….

@@@

திருக்குறள் முருகானந்தம் 

சோலை குயில்களில் தன் இலக்கியப் பயணத்தை தொடங்கியவர் .இன்று புவியெங்கும் செம்மொழித் தமிழை பரப்பிய செம்மல் .இளைய தலைமுறை யினரைகைபிடித்து நடத்திச் சென்ற வழிகாட்டி .கலை இலக்கிய இரவு என்ற ஒரு புதிய இலக்கிய மேடையைஉருவாக்கியவர். மறைந்த சமூக ஞானி தவத்திருகுன்றக்குடி அடிகளாரின்உள்ளம் கவர்ந்தவர்.தவத்திரு பொன்னம்பல அடிகளாரை கலை இலக்கிய இரவு நிகழ்ச்சிகளில் பங்கேற்க செய்து இளைஞர்களுக்கு இலக்கிய தாகத்தை ஏற்படுத்தியவர் .இவர் சொல் வல்லார்.சோர்விலார் .அவை அஞ்சார். இவரது இழப்பு தமிழ் இலக்கிய உலகிற்குபேரிழப்பாகும். இவரது இழப்பு இன்றைய இளம் இலக்கியவாதிகளுக்கு பேரிழப்பாகும் .நாளும் நற்றமிழால் தன் நாவால் நடனமாட வைத்த நந்தலாலா புகழ் ஓங்குக

@@@

கோவி.லெனின் – மூத்த பத்திரிகையாளர் 

மதுரை எம்.பி. சு. வெங்கடேசன் 

“காணி நிலம்”

நந்தலாலா…

நிரந்தரமாகக்

கண் மூடி விட்டார்.

தனது

சிந்தனையையும்

எவருக்கும்

வலிக்காமல்

வாழைப்

பழத்தில்

ஊசி ஏற்றுவது

போல

எள்ளலுடன்

உரையாற்றி

எல்லோரையும்

ஈர்த்தவர்

தனது

உரை

வீச்சினையும்

தனது

உரையாடல்களையும்

நிரந்தரமாக

நிறுத்திக் கொண்டார்.

திருச்சி

கருமண்டபம்

அருகே

திருநகரில்

ஒரு தெருவில்

உள்ள

அவரது

வீட்டுக்கு

“காணி நிலம்”

என்று தான்

பெயர்.

தோழமை

வணக்கம்…

தோழர்

நந்தலாலா

அவர்களுக்கு…

@@@

தஞ்சை இனியன் 

தோழர் புலியூர் 

@@@

திருச்சி கரிகாலன் அச்சகம் 

அன்புள்ள தோழ ( அண்ண ) னே !

நந்தலாலா….

இலக்கிய வானில் சிறகடித்த நீ
வானில் சிறகடிக்க சென்று விட்டாய் !

நீ வீசிய க(விதைகளில் ) முளைத்த
செடிகளில் நானும் ஒருவன்

உன் இதயம் இயங்கவில்லை என்கிறார்கள்
எங்கள் இதயங்களில் நீ
ஓடிக்கொண்டு தான் இருக்கிறாய் ( நினைவாக )

.. இடிந்த இதயத்துடன்..
கலங்கிய கண்களுடன்…

திருச்சி கரிகாலன் அச்சகம் 

இறுதி நிகழ்வுகள் மார்ச் 6ஆம் தேதி பகலில் நடைபெறும்

—–நாடறிந்த பேச்சாளர், எழுத்தாளர், கவிஞர் நந்தலாலா (70), உடல்நலக் குறைவு காரணமாக பெங்களூருவிலுள்ள தனியார் மருத்துவமனையில் செவ்வாய்க்கிழமை (மார்ச் 4ஆம் தேதி) காலை இயற்கை எய்தினார்.இந்தியன் வங்கியில் பணிபுரிந்து ஓய்வுபெற்ற நந்தலாலாவின் இயற்பெயர் நெடுஞ்செழியன். பாரதியார் மீது கொண்ட தீராப்பற்றின் காரணமாக தனது பெயரை ‘நந்தலாலா’ என வைத்துக் கொண்டார்.திருச்சியில் 1990-களில் அவர் ஒருங்கிணைத்த ‘சோலைக்குயில்’ என்ற பத்திரிகையும், அமைப்பும் ஏராளமான இலக்கியவாதிகளை உருவாக்கியது.

பெரியார், அம்பேத்கர் மற்றும் இடதுசாரிக் கருத்தியலை மேடைதோறும், தொலைக்காட்சிகளிலும், வானொலிகளிலும் எடுத்துச் சென்றவர்.

தமிழ்நாடு முற்போக்கு எழுத்தாளர் கலைஞர்கள் சங்கத்தின் மாநிலத் துணைத் தலைவராகப் பொறுப்பு வகித்தார். தமிழ்நாடு அரசின் இயல் இசை நாடக மன்றத்தின் பொதுக்குழு உறுப்பினராகவும் செயல்பட்டார்.

நந்தலாலாவுக்கு மனைவி ஜெயந்தி, மகள்கள் பாரதி, நிவேதிதா ஆகியோர் உள்ளனர்.

பெங்களூருவில் இருந்து அவரது உடல், (புதன்கிழமை) அதிகாலை திருச்சி வந்தடையும். திருச்சி கருமண்டபம் விஸ்வாஸ் நகர், திருநகர் 3ஆவது பிரதான வீதியிலுள்ள அவரது இல்லமான ‘காணி நிலத்தில்’ உறவினர்கள் மற்றும் தோழர்களின் அஞ்சலிக்காக வைக்கப்படும்.

வரும் மார்ச் 6ஆம் தேதி வியாழக்கிழமை முற்பகல் 11 மணிக்கு வீட்டிலிருந்து இறுதி ஊர்வலம் தொடங்கி, 12 முதல் ஒரு மணிக்குள் ஓயாமாரி எரிவாயு மயானத்தில் இறுதி நிகழ்வுகள் நடைபெறும்.

திருச்சியின் காத்திரமான இலக்கிய அமைப்பாக ‘களம்’ உருவாவதற்கு கடந்த 16 ஆண்டுகளுக்கு முன்பே எழுத்தாளர் ஞாநியுடன் ஆலோசகராக இருந்து தொடர்ந்து வழிகாட்டி வந்த நந்தலாலாவின் மறைவு, ஈடு செய்ய முடியாத இழப்பு என்பதை களம் பதிவு செய்கிறது.

-களம் அமைப்பு

@@@

கவிஞர் நந்தலாலாவின்
மறைவால்
இலக்கிய வட்டத்தில்
ஓர் இருள் விழுந்துவிட்டது
சமூகத்தின் வெளிவட்டத்தால்
அதிகம் அறியப்படாதவரும்
உள்வட்டத்தில்
கொண்டாடப்பட்டவருமான நந்தலாலா,
பகுத்தறிவாளர் முற்போக்காளர் சிந்தனையாளர்
சிறந்த பேச்சாளர்,
இத்தனை கலவைகளோடு
ஓர் இலக்கியவாதி
அமைவது அரிது
ஒரு தனிமனிதனின் மரணம்
வனாந்தரத்தில்
ஓர் இலை விழுவது போன்றது
ஓர் இலக்கியவாதியின் மரணம்
ஆலமரத்தில்
கிளை விழுவது போன்றது
என் நண்பரை இழந்து
நலிவடைகிறேன்
குடும்பத்தார்க்கும்
இலக்கிய அன்பர்களுக்கும்
என் இதய இரங்கல்
இனி திருச்சியைக்
கடக்கும்போதெல்லாம்
அவர் நினைவு
என் நெஞ்சைச் சுடும்
-கவிப்பேரரசு வைரமுத்து.