இராஜம் கிருஷ்ணன் நூற்றாண்டு விழா ! யாவரும் கேளீர் : தமிழியல் பொதுமேடை- தொடர் 31

“களங்களுக்குச் சென்று மக்கள் வாழ்வியலைக் கதையாக ஆக்கியவர்”- பேராசிரியர் ஆ.இராசாத்தி பெருமிதம்

அங்குசம் சமூக நல அறக்கட்டளை சார்பில் யாவரும் கேளீர் தமிழியல் பொதுமேடையின் 31 ஆம் நிகழ்வு 11.10.2025ஆம் நாள் நடைபெற்றது. தமிழின் தலைசிறந்த படைப்பாளி என்னும் அறியப்பட்ட இராஜம் கிருஷ்ணன் அவர்களின் நூற்றாண்டு விழாவாக நிகழ்ந்தது. இந்த நிகழ்வில் திருச்சி தூய வளனார் தன்னாட்சிக் கல்லூரி தமிழ்ப் பேராசிரியர் முனைவர் ஆ.இராசாத்தி கலந்துகொண்டு சிறப்புரையாற்றினார். நிகழ்ச்சி ஒருங்கிணைப்பாளர் பேராசிரியர் தி.நெடுஞ்செழியன் சிறப்புரையாளரை அவைக்கு அறிமுகம் செய்து வைத்தார். நிகழ்ச்சி ஒருங்கிணைப்பாளர் பேராசிரியர் கி.சதீஷ்குமாரன் சிறப்புரையாளருக்குப் பயனடை அணிவித்து சிறப்பு செய்தார். கீழைக்காற்று தோழர் இராஜா சிறப்புரையாளருக்கு நூல்கள் வழங்கி சிறப்பு செய்தார்.

நிகழ்வில் தொடக்க உரையாற்றிய ஒருங்கிணைப்பாளர் பேராசிரியர் தி.நெடுஞ்செழியன், “ பேராசிரியர் இராசாத்தி அவர்கள் ஒரு பெண்ணிய சிந்தனையாளர். அதுமட்டுமல்ல பெரியாரிய சிந்தனையோடு செயல்படக்கூடிய ஒரு பெருந்தகையாளர்.

இராஜம் நிறைய நாவல்களை எழுதி இருக்கிறார். சிறுகதைகளை எழுதி இருக்கிறார். களத்தில் கிடைக்கக்கூடிய தரவுகளை வைத்துக்கொண்டு நாவல்கள் எழுதிய ஒரு தமிழின் குறிப்பிடத்தக்க ஓர் படைப்பாளி. ராஜம் கிருஷ்ணனுடைய நாவல்களைத் தமிழ் நாவல்களுக்கு அடையாளமாக சொல்லுகிற அளவிற்கு அவர் நாவல்களை படைத்திருக்கிறார். அவருடைய கரிப்புமணிகள், கூட்டுக்குஞ்சுகள், குறிஞ்சித்தேன் போன்ற படைப்புகள் காலம் கடந்தும் இலக்கியவெளியில் உயிர்ப்புடன் இருக்கின்றன என்றால் அதுதான் படைப்பாளர் இராஜம் அவர்களுக்குப் பெருமையாகும்” என்று உரையை நிறைவு செய்தார்.

நிகழ்வில் நூற்றாண்டு காணும் இராஜம் கிருஷ்ணன் குறித்து சிறப்புரையாற்றிய பேராசிரியர் இராசாத்தி, “ 1925-ஆம் ஆண்டு தமிழகத்தின் திருச்சிராப்பள்ளி மாவட்டத்தில் உள்ள முசிறியில் பிறந்தவர். பள்ளிக்குச் சென்று முறையான கல்வி பயிலாதவர். பெண்கள் பூப்படையும் முன்பே திருமணம் செய்து வைத்துவிடும் அன்றைய சமூக வழக்கப்படி, 15வது வயதிலேயே ராஜம் கிருஷ்ணனுக்குத் திருமணம் செய்துவைக்கப்பட்டது. திருமணத்திற்குப் பின்னர் சென்னை கிழக்கு தாம்பரத்தில் குடியேறினார். மின் பொறியாளரான கணவரின் உதவியால் பல புத்தகங்களைப் படித்து, பின் தானே கதைகளை எழுத ஆரம்பித்தார்.

பொதுவாக, தனது படைப்புக்காகத் தேர்ந்தெடுக்கும் கதைக்களம் உள்ள பகுதிகளுக்கு நேரில் சென்று, அங்கு வாழும் மக்களோடு நெருங்கிப் பழகி உண்மை நிலைமைகளை அனுபவப்பூர்வமாக உணர்ந்துகொண்டு, அந்த உணர்வையும், அவர்களது உண்மையான முன்னேற்றத்திற்கான இலட்சியத்தையும் தம் எழுத்து வழியாகக் கொண்டுவந்தவர்.

1970 ஆம் ஆண்டு தூத்துக்குடி சென்று அங்குள்ள உப்பளத் தொழிலாளர்களின் நிலையை நேரடியாகக் கண்டு ‘கரிப்பு மணிகள்’ என்ற நாவலை எழுதினார். பீகார் கொள்ளைக்கூட்டத் தலைவன் ‘டாகுமான்சி’யை சந்தித்தவர். அதன் விளைவாக ‘முள்ளும் மலரும்’ என்ற நாவலை எழுதினார். பெண் சிசுக் கொலை முதலிய பல்வேறு சமூக அவலங்களைப் பற்றி எழுதியவர். சிவகாசியில் தீப்பெட்டி தொழிற்சாலையில் சிறுவர் பணியாற்றுவதை மையமாக வைத்து கூட்டுக்குஞ்சுகள் என்னும் நாவலை எழுதினார். நீலகிரி மலையில் வாழும் படகர் இன மக்களின் வாழ்வியலை குறிஞ்சித்தேன் என்னும் நாவலில் பதிவு செய்துள்ளார்.

இராஜம் கிருஷ்ணன் நூல்கள் தமிழக அரசால் 2009 ஆம் ஆண்டில் அரசுடமை ஆக்கப்பட்டன. முதன்முறையாக எழுத்தாளர் உயிருடன் இருந்தபோதே அரசுடைமை ஆக்கப்பட்டவை இவரது நூல்களே என்பது பெருமைக்குரிய செய்தியாகும்.

கீழ் தஞ்சை வட்டார வழக்கில் புகுந்து விளையாடுகிறார் ஆசிரியர். தான் அறியாததோ சேற்றும் நாற்றும். ஆனால், அறிந்ததோ நந்தன் சரித்திரம் என்று இப்புதினம் பின் உள்ள வரலாற்றை பதிவு செய்கிறார். அரிசனம் என்று பெயர் மாற்றியும் உயர்வு அடையாத நிலை . ஐந்தாம் வர்ண பஞ்சமர் மேல் இன்னும் கவலைப்படுகிறார். வெள்ளைக்காரர்களை ஏன் நாம் பஞ்சமர் என்று சொல்லவில்லை என்று  கேட்கிறார்.

நூற்றாண்டு காணும் இராஜம் கிருஷ்ணன் படைப்புகளை முழுமையாக ஆராய வேண்டிய தேவை உள்ளது என்பதை உணர்ந்து இலக்கிய உலகம் செயல்பட வேண்டும் என்று கேட்டுக்கொள்கிறேன்” என்று உரையை நிறைவு செய்தார்.

அங்குசம் சமூக நல அறக்கட்டளையின் தலைவர் ஜெடிஆர் சிறப்புரையாளருக்குச் சான்றிதழையும் இதழ்களையும் வழங்கி சிறப்பித்தார்.

இராஜம் கிருஷ்ணன் படைப்புகள்

புதினங்கள்

அமுதமாகி வருக, அழுக்கு, அவள், அலைகள், அலைவாய்க்கரையிலே,  அன்னையர்பூமி, அன்புக்கடல், ஆண்களோடு பெண்களும், இடிபாடுகள், உத்தரகாண்டம், உயிர் விளையும் நிலங்கள், ஓசைகள அடங்கிய பிறகு, கட்டுக்காவல், கதைக்கனிகள், கரிப்பு மணிகள், காக்கானி, குறிஞ்சித்தேன், கூடுகள், கூட்டுக்குஞ்சுகள், கைவிளக்கு, கோடுகளும் கோலங்களும், கோபுரபொம்மைகள், சத்திய வேள்வி, சலனங்கள், சுழலில் மிதக்கும் தீபங்கள், சேற்றில் மனிதர்கள், சோலைக்கிளி, தங்கமுள், தோட்டக்காரி, நிழற்கோலம், பவித்ரா, பாதையில் பதிந்த அடிகள், பாரதகுமாரிகள், பானுவின் காதலன், புதியதோர் உலகம் செய்வோம், புதிய கீதம், புதிய சிறகுகள், புயலின் மையம், பெண்குரல், மண்ணகத்துப்பூந்துளிகள், மலர்கள், மலையருவி, மாணிக்க கங்கை, மாயச்சுழல், மாறி மாறி பின்னும், மானுடத்தின் மகரந்தங்கள், முள்ளும் மலர்ந்தது, வளைக்கரம், வனதேவியின் மைந்தர்கள், விடியும்முன், விலங்குகள், வீடு, வேருக்கு நீர், ரோஜா இதழ்கள்.

சிறுகதைத் தொகுதிகள் :

அலைகடலிலே, அல்லி, உயிர்ப்பு, ஊசியும் உணர்வும், கல்வி, களம், கனவு, கிழமைக்கதைகள், சிவப்பு ரோஜோ, நித்திய மல்லிகை, பச்சைக்கொடி, மலைரோஜா, மின்னி மறையும் வைரங்கள், வடிகால், வண்ணக்கதைகள், வெளிச்சம், பெண்ணியம், காலம்தோறும் பெண், காலம்தோறும் பெண்மை, யாதுமாகி நின்றாய், இந்திய சமுதாய வரலாற்றில் பெண்மை.

வாழ்க்கை வரலாறு :

டாக்டர் ரங்காச்சாரி, பாஞ்சாலி சபதம் பாடிய பாரதி, சத்திய தரிசனம்.

தன் வாழ்க்கைக் குறிப்பு : காலம்

—   ஆதவன்