Bigg Boss – டெலிவிஷன் ட்ராமா vs நிஜ வாழ்க்கை — மனநிலையைக் குலைக்கும் பொழுதுபோக்கு!

Bigg Boss பாக்கறீங்களா? அப்போ இதை படிக்கணும் முதல்ல…

சண்டை பார்க்க நாம வந்தோம், ஆனா சமாதானம் மறந்துட்டோம்!

தொலைக்காட்சியில் ஒளிபரப்பாகும் “Bigg Boss” நிகழ்ச்சி இன்று ஒரு சாதாரண பொழுதுபோக்கு நிகழ்ச்சியாக இல்லை; அது சமூக விவாதங்களின் மையமாக மாறியுள்ளது. முதலில் மக்களை சிரிக்க வைக்கும், போட்டி உணர்வைத் தூண்டும் ஒரு ஷோவாகத் தொடங்கிய இது, இப்போது “டிராமா”வையும் “அதிகரித்த உணர்ச்சிகளையும்” விற்பனை செய்யும் ஒரு வணிக வடிவமாக மாறிவிட்டது. இங்கே ஒவ்வொரு நாளும் சண்டை, அழுகை, காதல், குரல் எழுப்புதல், பழிவாங்குதல் போன்ற சம்பவங்கள் நடப்பது வழக்கமாகிவிட்டது. இதை சிலர் “தியோட்ராமா” (theodrama) எனக் குறிப்பிடுகிறார்கள்.

“தியோட்ராமா” என்றால் “பெரிய மேடை நாடகம்” அல்லது “அரங்கேற்றம்” என்று பொருள் — அதாவது உண்மையிலேயே நிகழாத சம்பவங்களையும் மிகைப்படுத்தி, உண்மையாக நடந்தது போல மக்கள் உணர்வுகளை ஈர்க்கும் ஒரு நாடகத் தோற்றம். Bigg Boss-இல் இதுதான் நடக்கிறது. ஒவ்வொரு போட்டியாளரும் தங்கள் வாழ்வை வெளிப்படுத்தும் விதத்தில் நடிக்கிறார்கள்; ஆனால் பல நேரங்களில் அதில் உண்மை மற்றும் நடிப்பு கலந்துவிடுகிறது. இதனால் பார்வையாளர்கள் “இது உண்மையா, நாடகமா?” என்ற குழப்பத்தில் சிக்கிக்கொள்கிறார்கள்.

இந்த நிகழ்ச்சியை பலர் “வாழ்க்கை நிஜம்” எனக் கருதுகிறார்கள். சிலர் சண்டைகளை ரசிக்கிறார்கள்; சிலர் போட்டியைப் பாராட்டுகிறார்கள். ஆனால் பெரும்பாலானவர்கள் இதன் வழியாக சண்டை, கோபம், அவமதிப்பு, பொய்மைகள் போன்றவற்றை சாதாரணமாகப் பார்க்கத் தொடங்கியுள்ளனர். “குரல் எழுப்பினா தான் சரி”, “எதிர்த்தா தான் தைரியம்” என்ற ஒரு தவறான எண்ணம் உருவாகியுள்ளது. இதே காரணத்தால் இளம் தலைமுறை இதை ஒரு “மாதிரி நடத்தை” என்று எடுத்துக்கொள்கிறது. சமூக வலைதளங்களில் “யார் சரி? யார் தவறு?” என்ற விவாதங்கள் தினசரி டிரெண்டாகின்றன. இவை எல்லாம் பார்வையாளர்களின் மனநிலையைத் தாக்குகின்றன.

Bigg Boss Tamil சீசன் 9 இதற்கு ஒரு தெளிவான எடுத்துக்காட்டு. சமூக வலைதளங்களில் தினசரி இதைச் சுற்றி ஒரு புதிய சர்ச்சை எழுகிறது. கடந்த சில வாரங்களில், போட்டியாளர் நந்தினி மனஅழுத்தத்தால் நிகழ்ச்சியை விட்டு வெளியேறிய சம்பவம் பெரும் கவனத்தை பெற்றது. இதுவே Bigg Boss வீடு எவ்வளவு மன உளைச்சலை ஏற்படுத்துகிறது என்பதற்கான சான்றாக இருந்தது. மற்றொரு பக்கம், Aadhirai Soundarrajan கூறிய “நியமன காரணங்கள்” பலரை அதிர்ச்சியடையச் செய்தன. “நண்பர்களை ஆதரிக்கிறீர்கள்”, “சோஷியல் மீடியா பிரபலம் என்பதற்காக வாக்களிக்கிறீர்கள்” என்ற குற்றச்சாட்டுகள் வீட்டுக்குள் பிரிவினை உருவாக்கின.

அதோடு, காதல் – கோபம் கலந்த ‘love triangle’ கதை சமூக வலைதளங்களில் வெடித்து, “real love or game plan?” என்ற கேள்விகள் டிரெண்டானது. இதே சமயத்தில் திவாகர் பற்றிய பிரச்சனையும் பரபரப்பாக பேசப்பட்டது. மற்ற போட்டியாளர்கள் அவரை “அதிக நம்பிக்கை” மற்றும் “குழுவாக விளையாடுகிறார்” என்று குற்றம் சாட்டினர். அவர் மீதான நியமன விவாதங்கள், குரல் உயர்த்தல், மற்றும் சில கடும் சொல் மோதல்கள் வீட்டுக்குள் பதட்டம் ஏற்படுத்தின. இதனால் ரசிகர்கள் இரு பிரிவாகப் பிளந்து, சமூக வலைதளங்களில் “#JusticeForDiwakar” மற்றும் “#DiwakarPlayingSmart” போன்ற ஹாஷ்டேக்குகள் டிரெண்டானது. இந்த நிகழ்வும் Bigg Boss வீட்டின் உணர்ச்சி வெடிப்பை வெளிப்படுத்தும் ஒரு எடுத்துக்காட்டாக மாறியது.

சமீபத்தில் TVK தலைவர் வேல்முருகனும் Bigg Boss-ஐ “தமிழ் பண்பாட்டுக்கு விரோதமானது” எனக் கூறி தடை செய்ய வேண்டும் என வலியுறுத்தியுள்ளார். அவர் குறிப்பிட்டது போல, சில காட்சிகள் மிகுந்த அசிங்கம், மரியாதை இல்லாமை, சமூக நெறிமுறைகளுக்கு மாறானவை என விமர்சிக்கப்பட்டன. இதுவே Bigg Boss ஒரு பொழுதுபோக்கு நிகழ்ச்சியைத் தாண்டி, பண்பாட்டு விவாதத்திற்குள் இழுக்கப்பட்டுள்ளது என்பதை காட்டுகிறது. இதற்கிடையில் சமூக வலைதளங்களில் “fake audition messages” என்று சிலர் புகார் அளித்தனர். Bigg Boss-க்கு ஆடிஷன் என்ற பெயரில் போலி கணக்குகள் மூலம் தனிப்பட்ட தகவல்கள் கேட்கப்பட்டன. இதுவும் Bigg Boss பிரபலம் எவ்வளவு பெரிதாகிவிட்டது என்பதற்கான மறைமுக சான்று தான் — ஒரு தொலைக்காட்சி நிகழ்ச்சி ஒரு வணிக மையம் போல மாறிவிட்டது.

இந்த அனைத்து நிகழ்வுகளும் ஒரே ஒரு விஷயத்தை நமக்கு நினைவூட்டுகின்றன — Bigg Boss நம் மனநலத்தைப் பாதிக்கிறது. போட்டியாளர்கள் மட்டுமல்ல, பார்வையாளர்களும் அந்த மனஅழுத்தத்தில் சிக்கிக்கொள்கிறார்கள். “நீங்கள் இதுபோல நடந்துகொள்ள வேண்டும்”, “அந்த மாதிரி பேசினா தான் மக்கள் கவனிப்பாங்க” என்ற நம்பிக்கை உருவாகிறது. இதனால் பொறுமை, மரியாதை, ஒழுக்கம் போன்ற மதிப்புகள் குறைந்து வருகிறன. பொழுதுபோக்கு என்ற பெயரில் வன்முறை, அவமதிப்பு, கோபம், பழிவாங்குதல் போன்றவற்றைச் சாதாரணமாகக் காட்டும் இந்த நிகழ்ச்சி சமூகத்தில் ஒரு புதிய “டிராமா கலாச்சாரத்தை” உருவாக்கியுள்ளது.

ஒவ்வொரு நிமிடமும் காமிரா முன் நடக்கும் உணர்ச்சிப் புயல் “தியோட்ராமா”வாக வெளிப்படுகிறது — அதாவது உண்மையா, நடிப்பா என்ற எல்லை மறைந்துவிடுகிறது. இந்தக் கலப்பே பார்வையாளர்களின் மனதில் குழப்பத்தையும் அழுத்தத்தையும் உண்டாக்குகிறது. அதனால், Bigg Boss ஒரு பொழுதுபோக்காக இருக்கலாம், ஆனால் அது நம் உணர்வுகளை விளையாடும் விளையாட்டு ஆகக்கூடாது. மனநலத்தையும் சமூக மதிப்புகளையும் காக்க வேண்டியது அவசியம். பார்வையாளர்கள் எதை ரசிக்க வேண்டும், எதை தவிர்க்க வேண்டும் என்பதை தெளிவாக அறிந்திருக்க வேண்டும். மீடியா நிறுவனங்களும் “TRP” என்ற பெயரில் எல்லாவற்றையும் தாண்டி போகாமல் பொறுப்புடன் உள்ளடக்கம் வழங்க வேண்டும்.

பொழுதுபோக்கு நம் மனஅழுத்தத்தை குறைக்க வேண்டும் — அதைப் பெருக்க கூடாது. சண்டை பார்க்கலாம், ஆனா சமாதானம் மறக்கக்கூடாது. அதுவே உண்மையான ‘என்டர்டெயின்மெண்ட்’!

 

  -மதுமிதா