மஞ்ச மாக்கான் டீம் ஃபேன்ஸ் என்ன சொல்லுறானுங்க? PLக்கு முன்பும் கிரிக்கெட் இருந்தது-தொடா் 08

“மஞ்ச மாக்கான் டீம் ஃபேன்ஸ் என்ன சொல்லுறானுங்க?”

“பொம்பள கப் டீம் ஃபேன்ஸ் சௌக்கியமா?”

சி.எஸ்.கே.வும், ஆர்.சி.பி.யும் மோதும் மேட்ச்சளின்போது சமூக வலைத்தளங்களில் இப்படி கழுவி ஊற்றிக் கொள்வதை கிராமங்களில் மஞ்சத் தண்ணீர் ஊற்றி விளையாடுவது போல, தொடர்ந்து செய்து கொண்டிருக்கிறார்கள்.

“பழியைத் தீர்த்துட்டோம்ல’‘ என்று ஒருதரப்பும், “இதற்கே இத்தனை வருசமா?” என்று இன்னொரு தரப்பும் முட்டி மோதிக் கொள்கின்றன.

நடிகை ராதிகா டெம்ப்ளட்டில், “30 பால்ல 31 ரன் அடிச்சி அவுட்டான கோலி எங்க? 16 பால்ல 30 ரன் அடிச்சு நாட் அவுட்டா நின்ன தோனி எங்கே?” என்ற பதிவைப் படித்தபோது, “அண்ணே நீங்க எஸ்.எஸ்.எல்.சி. ஃபெயில்னே, நான் எட்டாவது பாஸ்ணே” என்ற செந்தில் – கவுண்டமணி காமெடிதான் நினைவுக்கு வந்தது.

சமூக வலைத்தள கழுவி ஊற்றல்களுக்கும் களத்தின் உண்மை நிலவரங்களுக்கும் பல நேரங்களில் பெரிய இடைவெளி இருக்கும். முட்டையிடும் கோழிக்குத்தான் வலி தெரியும். ஆம்லெட்டாக்கி சாப்பிடலாமா, ஆஃபாயில் போடலாமா என நினைப்பவர்கள் ரசிகர்கள். தோனியும் கோலியும் முட்டையிடும் கோழிகள். அதுவும் அவரவர் டீம் ஓனர்களுக்கு பொன்முட்டையிடும் கோழிகள்.

போட்டியின் முடிவு எப்படி இருந்தாலும் ரசிகர்கள் அவரவர் பார்வையில் தங்களுக்கு சாதகமானவற்றை மட்டும் கவனிப்பது என்பதுதான் கிரிக்கெட் விளையாட்டின் சிறப்பு. தல நின்ன ஸ்டைல பாரு. கிங் பார்த்த பார்வையைப் பாரு என்று இரு தரப்பும் மல்யுத்தம் நடத்திக் கொண்டே இருக்கிறது. இப்படிப்பட்ட ரசிகர்களை ஈர்க்கும் ஆட்டத்தைத்தான் கெர்ரி பாக்கர் அப்போது எதிர்பார்த்தார். ஸ்டேடியத்தில் ரசிகர்கள் கூடினால்தான் உணர்ச்சிகரமாக இருக்கும். அது மெல்ல மெல்ல வெறித்தனமாக இருக்கும்.

பவுலரின் கையில் வெள்ளைப் பந்தைக் கொடுத்த பாக்கர் தன்னுடன் ஆலோசனையில் இருந்தவர்களிடம் சொன்னார், “ஃப்ளட் லைட்டில் போட்டிகளை நடத்தலாம்”.

“வாவ்” என்றனர், சுற்றி இருந்தவர்கள். சூரிய வெளிச்சத்தை மட்டும் நம்பியிருக்காமல், மின் விளக்கொளியில் போட்டிகளை நடத்திப் பார்க்கலாம் என்ற முயற்சிகள் இங்கிலாந்தில் ஏற்கெனவே தொடங்கியிருந்தன. ஃபுட்பால் மேட்ச்கள் மின்னொளியில் நடத்தப்பட்டிருந்ததால், கிரிக்கெட்டையும் கவுன்ட்டி மேட்ச் எனப்படும் உள்ளூர் அணிகளின் ஆட்டங்களில் பயன்படுத்திப் பார்த்தனர். ஆஸ்திரேலியாவிலும் ஒரு சில முயற்சிகள்  மேற்கொள்ளப்பட்டிருக்கின்றன. ஒன்றரை மணி நேர ஃபுட்பால் ஆட்டத்திற்கு ஃப்ளட் லைட் சரிப்படுமா? என்ற கேள்வியும் இருந்தது. “பால்காரர் வருவதற்குள்ளாவது லாஸ்ட் விக்கெட் விழுந்திடுமா?” என்று பத்திரிகைகள் கேட்டன.

டெஸ்ட் மேட்ச்களை முழுமையாக விளக்கொளியில் நடத்துவது என்பது விளையாடுபவர்களுக்கு சோதனையாக இருந்தது. உடல் அசதியுடன், கண்கள் கடுமையான சோர்வுக்கு ஆளாகியிருந்தன. கெர்ரி பாக்கர் டே – நைட் மேட்ச்சாக  வோர்ல்ட் சீரிஸ் கிரிக்கெட்டை நடத்த முடிவு செய்தார். உலகக் கோப்பை போட்டிகளைப் போல ஒரு நாள் ஆட்டங்களாக நடத்துவதுதான் சரியாக இருக்கும் என்றனர் உடனிருந்தவர்கள்.

1978 ஆம் ஆண்டு நவம்பர் 28 ஆம் நாள் பாக்கரின் ஆஸ்திரேலியா டீமும், பாக்கரின் வெஸ்ட் இன்டீஸ் டீமும் சிட்னி கிரிக்கெட் மைதானத்தில் ஆட்டத்தைத் தொடங்கின. வோர்ல்டு சீரிஸ் கிரிக்கெட்டின் முதல் டே – நைட் ஒருநாள் போட்டியில் வெஸ்ட் இன்டீஸை ஆஸ்திரேலியா சேஸிங்கில் வென்றது. சூரியன் மறைந்தபிறகும் கிரிக்கெட் மைதானங்களில்  அஸ்தமனமே இல்லை என்ற நிலையை வெற்றிகரமாக தொடங்கி வைத்தார் பாக்கர்.

வெற்றி எனச் சொல்வது மின்னொளி வெளிச்சத் தன்மையையும், ஆட்டத்தின் முடிவையும் பொருத்தது மட்டுமல்ல, பகல் நேர டெஸ்ட் கிரிக்கெட் போட்டிக்கு ஸ்டேடியம் மொத்தமுமே 2000 பேர் இருந்தாலே பெரிது என்றிருந்த நிலையில், பகல் – இரவு ஆட்டத்தின்போது சிட்னி ஸ்டேடியத்தில் கிட்டதட்ட 50ஆயிரம் ரசிகர்கள் திரண்டிருந்தனர். பாக்கருக்கு உற்சாகம் பிறந்தது. அந்த உற்சாகம் கலர் கலராக வெளிப்பட்டது.

கிரிக்கெட் என்றால் வெள்ளை உடை அணிந்துதான் விளையாட வேண்டும் என்பதை மாற்றி, பாக்கர் உருவாக்கிய மூன்று அணிகளுக்கும் தனித்தனி நிறங்களில் உடைகள் வழங்கப்பட்டன. அணிக்கொரு கலர் என்பது கிரிக்கெட் ரசிகர்களின் கண்களை ஈர்த்தது. பாக்கர் உருவாக்கிய அணிகளையோ, அவர் நடத்தும் மேட்ச்களையோ அங்கீகரிக்க மறுத்த ஐ.சி.சி.யையும் பாக்கரின் கலர் டிரஸ் டீமும், டே – நைட்  மேட்ச்சும் ஈர்க்கத் தொடங்கியது.

(ஆட்டம் தொடரும்)

கோவி.லெனின், மூத்த பத்திாிகையாளா்