மலைகளின் சமநிலையைக் காக்கும் “பனிச் சிறுத்தைகள்”

ஒவ்வோர் ஆண்டும் அக்டோபர் 23ஆம் தேதி உலகப் பனிச் சிறுத்தைகள் தினம் (International Snow Leopard Day) கடைப்பிடிக்கப்படுகிறது. பனிச் சிறுத்தைகளைப் பாதுகாப்பது குறித்த விழிப்புணர்வை உலக மக்களிடையே ஏற்படுத்துவதே இத்தினத்தின் முக்கிய நோக்கமாகும். 2013ஆம் ஆண்டு அக்டோபர் 23 அன்று கிர்கிஸ்தானில் நடைபெற்ற பனிச் சிறுத்தை பாதுகாப்பு தொடர்பான சர்வதேச மாநாட்டின் மூலம் இத்தினம் முக்கியத்துவம் பெற்றது. பனிச் சிறுத்தைகளின் வாழிடங்களைப் பாதுகாத்தல், சட்டவிரோத வேட்டையைத் தடுத்தல் மற்றும் மலைப்பகுதி மக்களிடையே விழிப்புணர்வை வளர்த்தல் ஆகியவை இந்நாளில் வலியுறுத்தப்படுகின்றன.

பனிச் சிறுத்தை (Snow Leopard) உலகின் மிக அழகான மற்றும் அரிய வனவிலங்குகளில் ஒன்றாகும். இது ஆசியாவின் உயரமான பனிமலைப் பகுதிகளில் வாழ்கிறது. இதன் அறிவியல் பெயர் Panthera uncia ஆகும். இமயமலை, திபெத்திய பீடபூமி மற்றும் மத்திய ஆசியாவின் மலைத்தொடர்கள் இதன் முக்கிய வாழிடங்களாகும். இந்தியாவில் லடாக், இமாச்சலப் பிரதேசம், உத்தராகண்ட், சிக்கிம் மற்றும் அருணாச்சலப் பிரதேசத்தின் சில பகுதிகளில் இவற்றைக் காணலாம்.

பனிச் சிறுத்தையின் உடல் சாம்பல் கலந்த வெள்ளை நிறத்திலும், கருமையான புள்ளிகள் மற்றும் வளைய வடிவக் குறிகளுடனும் காணப்படும். இதன் அடர்த்தியான ரோமங்கள் கடுமையான குளிரிலிருந்து உடலைப் பாதுகாக்கின்றன. நீளமான, அடர்த்தியான வால் பாறைகளில் தாவும்போது சமநிலையைப் பராமரிக்கவும், ஓய்வெடுக்கும்போது உடலைச் சுற்றிப் போர்த்திக்கொள்ளவும் உதவுகிறது. அகலமான பாதங்கள் பனியில் நடக்க உதவுகின்றன.

கடல் மட்டத்திலிருந்து பொதுவாக 3,000–4,500 மீட்டர் உயரத்தில் வாழ்கின்றன. இது சுமார் 9,840–14,760 அடி ஆகும்.

சில பகுதிகளில் 5,500 மீட்டர் (சுமார் 18,045 அடி) உயரம் வரையிலும் காணப்படுகின்றன.

இந்தியா, நேபாளம், பூடான், சீனா உள்ளிட்ட மத்திய ஆசிய மலைப்பகுதிகளில் வாழ்கின்றன.

இதன் கர்ப்பகாலம் சுமார் 93–110 நாட்கள் (3 முதல் 3½ மாதங்கள்).

ஜூன்–ஜூலை மாதங்களில்  இனப் பெருக்கம் செய்யும்.

குட்டிகள் சுதந்திரமாக சுமார் 18–22 மாதங்களில் வாழத் தொடங்கும்.

பனிச் சிறுத்தைகள் தனித்து வாழும் இயல்புடையவை. இவை முக்கியமாக நீல ஆடுகள் போன்ற மலைவாழ் தாவர உண்ணிகளை வேட்டையாடி உண்கின்றன. உணவுச் சங்கிலியின் சமநிலையைப் பேணுவதில் முக்கியப் பங்கு வகிக்கின்றன.

இன்று நாம் எதிர்கொளளும் புவி வெப்பமடைதல் பனிச்சிறுத்தைகள் வாழ்வை பாதிக்கிறது. காலநிலை மாற்றம், வாழிட இழப்பு, சட்டவிரோத வேட்டை, இரை விலங்குகளின் எண்ணிக்கை குறைதல் மற்றும் மனிதர்களுடனான மோதல்கள் ஆகியவை அவற்றின் வாழ்வைப் பாதிக்கின்றன. இவற்றைப் பாதுகாக்க இயற்கை வாழிடங்களைப் பேணுதல், வேட்டையைத் தடுத்தல், வனவிலங்கு ஆராய்ச்சியை ஊக்குவித்தல் மற்றும் உள்ளூர் மக்களுக்கு விழிப்புணர்வு ஏற்படுத்துதல் அவசியமாகும்.

பனிச் சிறுத்தை என்பது அழகிய விலங்கு மட்டுமல்ல; மலைகளின் இயற்கைச் சமநிலையைப் பாதுகாக்கும் முக்கிய உயிரினமாகும். உலகப் பனிச் சிறுத்தைகள் தினத்தில் அவற்றைப் பாதுகாப்பதற்கான உறுதிமொழியை ஏற்போம்.

 

ஜெயராம் ஜி , ஓவிய ஆசிரியர் 

கடையநல்லூர்.