”பெரியாரை யாரும் வெல்லவும் முடியாது, வீழ்த்தவும் முடியாது” – கனிமொழி கருணாநிதி பேச்சு!

விழுப்புரம் தெற்கு மாவட்ட திமுக மகளிர் அணி மற்றும் மகளிர் தொண்டர் அணி ஆலோசனைக் கூட்டம் விழுப்புரத்தில் உள்ள கலைஞர் அறிவாலயத்தில் (12/02/2025) நடைபெற்றது. இதில், திமுக துணைப் பொதுச் செயலாளரும், நாடாளுமன்ற குழுத் தலைவருமான கனிமொழி கருணாநிதி கலந்து கொண்டு எதிர்வரும் 2026 சட்டமன்ற தேர்தல் களத்தில் மேற்கொள்ள வேண்டிய பணிகள் குறித்து மகளிர் அணி மற்றும் மகளிர் தொண்டர் அணியினருக்கு ஆலோசனை வழங்கினார்.

முன்னதாக, திமுக துணைப் பொதுச் செயலாளரும், வனத்துறை அமைச்சருமான க.பொன்முடி, கனிமொழி கருணாநிதிக்கு சால்வை அணிவித்து வரவேற்பு அளித்தார்.

ஆலோசனை கூட்டத்தில் பேசிய கனிமொழி கருணாநிதி எம்.பி: வரக்கூடிய தேர்தலில் நாம் பெற்றியிருக்கக்கூடிய உரிமைகள், நாம் புரிந்து வைத்துள்ள உண்மைகளைப் பாதுகாக்க வேண்டிய தேர்தல். அனைவரும் சமம் என்ற திராவிட இயக்கத்தின் கருத்தியலை கொண்டது நீதிக் கட்சி. உள்ளாட்சித் தேர்தல்களில் பெண்களுக்கு 50% ஆட்சிப் பொறுப்பில் பங்கு பெறக் கூடிய வாய்ப்பு இருக்கிறது. பெண்கள் பல தடைகளைத் தாண்டி அரசியலில் நாங்களும் பங்குபெறுவோம் என்று சொல்லக் கூடிய அளவிற்கு வளர்ந்துவிட்டனர். பெண்களுக்கான வளர்ச்சி என்ற ஆட்சி இருந்தால்தான், நம்முடைய முன்னேற்றம் தடை இல்லாமல் இருக்கும்.

நம்முடைய முதலமைச்சர் அவர்கள் கல்லூரி மாணவிகளுக்கு புதுமைப் பெண் திட்டம், மாணவா்களுக்கான தமிழ் புதல்வன் திட்டத்தின் மூலமும் பள்ளி, கல்லூரியில் படிக்கும் மாணவிகளுக்கு, நீங்கள் படித்தால் மட்டும் போதும், உங்களுடைய வளர்ச்சிக்கு ஒரு தந்தை போல அரணாக இருக்கிறார் நாம் முதலமைச்சர் .

கலைஞர் அவர்கள் திருமண உதவி திட்டத்தின் மூலம் பத்தாவது வரை படிக்கும் பெண்களுக்குத் திருமண உதவித் தொகை திட்டம். திருமணமான பெண்கள் சமையல் அறையை விட்டு சீக்கிரம் வெளியே வர காஸ் அடுப்பு திட்டத்தை செயல்படுத்தினார்.

மேலும், மகளிர் உரிமை தொகை மூலம் மாதம் ஆயிரம் ரூபாய்  போன்ற பெண்களுக்கான  சிறப்பு  திட்டத்தைக் கொடுத்த ஆட்சி திமுக.

ஜாதியின் பெயரால், மதத்தின் பெயரால், ஆண் மற்றும் பெண் என்ற பாகுபாட்டால் பிளவுபடுத்தி, பிற்போக்கு சக்திகள் உருவாகிக் கொண்டு இருக்கின்றார்கள். அனைவரும் தந்தை பெரியாரைப் பற்றிப் படியுங்கள். பெண் ஏன் அடிமையானாள்? என்ற புத்தகத்தைத் தாண்டி பெண் விடுதலை பற்றி யாரும் சொன்னது இல்லை.

எது உனக்குத் தடையாக இருந்தாலும், தூக்கியெறி. உன்னுடைய கனவுகள், லட்சியங்கள், வாழ்க்கை தான் முக்கியம் என்று சொன்ன மிகப் பெரிய தலைவர் தான் பெரியார். அவரை கொச்சைப்படுத்தக் கூடிய, விமர்சனம் செய்யக்கூடிய நிலைமையை நாம் பார்க்கிறோம். பெரியாரை யாரும் வெல்லவும் முடியாது, வீழ்த்தவும் முடியாது.

சாதிக்க வேண்டும் என்ற லட்சியம் உடைய ஒவ்வொரு பெண்கள் மனதிலும் பெரியார் வாழ்கிறார். இந்த மண்ணில், ஜாதி, மதம் என்ற வேறுபாடு இல்லாமல் வாழக்கூடிய ஒவ்வொரு மனிதனின் மனதிலும் பெரியார் வாழ்கிறார், வாழ்வார். இதுதான், திராவிட மாடல் ஆட்சியின் அடிப்படை.

ஒன்றிய பட்ஜெட்டில் திருக்குறள் மட்டும் தான் தமிழ்நாட்டுக்கு சொன்ன விஷயம். குமரி எல்லையில் ஐயன் திருவள்ளுவருக்கு 133 அடி சிலை வைத்தவர் கலைஞர். இன்றைக்கு, விவேகானந்தர் பாறைக்கும் திருவள்ளுவர் சிலைக்கும் கண்ணாடி பாலம் கட்டிக்கொடுத்தவர் முதலமைச்சர்.

ஒன்றிய பட்ஜெட்டில், தமிழ்நாடு என்கிற பெயர் ஒரு இடத்தில் கூட இடம் பெறவில்லை. 100 நாள் வேலைத் திட்டத்தில் கிட்டத்தட்ட 84 லட்சம் பேர் இந்தியா முழுவதும் 100 நாள் வேலைத் திட்டத்தின் பட்டியலில் இருந்து பெயர்கள் அகற்றுப்பட்டுவிட்டன. இதுதான், ஒன்றிய அரசின் மிகப் பெரிய சாதனை.

தொடர் செய்திகளுக்கு அங்குசம் இதழ் வாட்ஸ்ஆப் சேனலில் இணைய இங்கே கிளிக் செய்யவும்.

100 நாள் வேலைத் திட்டம் கொண்டுவந்த நோக்கம் என்பது சாதாரண சாமானிய மக்களுக்குகான திட்டம். இந்தியா முழுவதும் 100 நாள் வேலைத் திட்டத்திற்குப் பணத்தை தருவதில்லை. பணத்தைக் குறைத்துக் குறைத்து, அந்த திட்டத்தை நிறுத்திவிட வேண்டும் என்பது தான் ஒன்றிய அரசின் எண்ணம்.

நம்மிடம் இருந்து வரி வாங்கிக்கொண்டு, நமது பிள்ளைகள் கல்விக்காகத் தரவேண்டிய ரூ. 2,000 கோடிக்கு மேல், நாம் ஹிந்தி படிக்க ஒத்துக் கொள்ளவில்லை என்று சொன்ன ஒற்றை காரணத்தில் நிறுத்தி வைக்கப்பட்டுள்ளது. நம்மிடம் இருந்து ஜி.எஸ்.டி மூலம் வரி பெற்றுக்கொண்டு, உத்தரப்பிரதேச மாநிலத்திற்குப் பலமடங்கு நிதியைத் தருகிறார்கள். ஆனால்,

டங்ஸ்டன் திட்டத்தை அனுமதிக்க மாட்டேன் என்று சட்டமன்றத்தில் தீர்மானத்தை முதலமைச்சர்  நிறைவேற்றினர், மக்களும் தொடர்ந்து போராடினார்கள். நாடாளுமன்றத்தில் அந்த திட்டத்தை கொண்டு வந்தபோது, அதிமுக ஆதரித்தது. எப்போதும் தமிழ்நாட்டு மக்களுக்காகக் குரல் கொடுக்கக்கூடிய, யாராக இருந்தாலும் எதிர்க்கக்கூடிய இயக்கம் திராவிட முன்னேற்றக் கழகம்.

உறவுக்கு கை கொடுப்போம், உரிமைக்குக் குரல் கொடுப்போம் என்ற கலைஞர் சொன்னது போல அவா் வழியில் நிற்கக்கூடிய ஆட்சி திமுக. நம்முடைய திட்டங்களை மக்களிடம் கொண்டு சொல்ல வேண்டிய கடமை நமக்கு இருக்கிறது. மேலும், இந்த திட்டங்களை அடுத்த தலைமுறைக்குக் கொண்டு சேர்க்க வேண்டிய கடமை உள்ளது என்று கனிமொழி உரையாற்றினார்.

இந்த ஆலோசனைக் கூட்டத்தில், விழுப்புரம் தெற்கு மாவட்ட திமுக பொறுப்பாளர் பொன் கௌதம் சிகாமணி, விழுப்புரம் சட்டமன்ற உறுப்பினர் ஆர். லட்சுமணன், விக்கிரவாண்டி சட்டமன்ற உறுப்பினர் அன்னியூர் சிவா, திமுக மகளிர் அணி செயலாளர் ஹெலன்டேவிட்சன், திமுக மகளிர் தொண்டர் அணி செயலாளர் நாமக்கல் ப. ராணி, திமுக மகளிர் அணி இணைச்செயலாளர் குமரி விஜயகுமார், திமுக மகளிர் தொண்டர் அணி இணைச்செயலாளரும், முன்னாள் அமைச்சருமான தமிழரசி ரவிக்குமார் எம்.எல்.ஏ., திமுக மகளிர் அணி பிரச்சாரக் குழுச் செயலாளர் சேலம் சுஜாதா, திமுக மகளிர் அணி பிரச்சாரக் குழுச் செயலாளர் ராணி ரவிச்சந்திரன் திமுக மகளிர் அணி பிரச்சாரக் குழுச் செயலாளர் மாலதி நாராயணசாமி, திமுக மகளிர் அணி சமூக வலைதள பொறுப்பாளர் அ.ரியா, திமுக மகளிர் அணி நிர்வாகிகள் மற்றும் தொண்டர்கள் உள்ளிட்ட பலர் கலந்து கொண்டனர்.