ஒரு ரயில்… ஒரு எலி… ஒரு பிரமாண்ட சினிமா! – ‘ஏழு கடல் ஏழு மலை’

‘ஏழு கடல் ஏழு மலை’ – இயக்குநர் ராம், ஒளிப்பதிவாளர் ஏகாம்பரம் பகிர்ந்த சுவாரஸ்ய பின்னணி

ஒரு ரயில் பெட்டி. அதற்குள் சில மனிதர்கள். வெளியே இரவு. மழை, இடி, மின்னல், தீபாவளி பட்டாசு வெளிச்சம்… இவற்றுக்கு நடுவே ஒரு கதை. இதைக் கேட்டால் எளிமையான திரைப்படமாகத் தோன்றலாம். ஆனால் அந்த இரண்டு ரயில் பெட்டிகளுக்குள் ஒரு சினிமாவையே உருவாக்கியிருக்கிறது ‘ஏழு கடல் ஏழு மலை’ படக்குழு.

இயக்குநர் ராம் மற்றும் ஒளிப்பதிவாளர் ஏகாம்பரம் பகிர்ந்துகொண்ட படத்தின் உருவாக்கப் பின்னணி, திரையில் நாம் பார்க்கப்போகும் காட்சிகளுக்குப் பின்னால் இருக்கும் பிரமாண்ட உழைப்பை வெளிப்படுத்துகிறது.

“இது Fantasy படம் இல்லை!”

‘ஏழு கடல் ஏழு மலை’ என்ற தலைப்பைக் கேட்டவுடன் மிகப்பெரிய Fantasy உலகத்துக்குள் பயணிக்கப்போகிறோம் என்ற எண்ணம் ஏற்படலாம். ஆனால் ராமின் பார்வையில் இது Fantasy படம் அல்ல. புனைவு இருக்கிறது; ஆனால் அது நிஜ வாழ்க்கையிலிருந்து முற்றிலும் விலகிய கற்பனை உலகம் கிடையாது.

ஒரு பெரியவர் குழந்தைக்குக் கதை சொல்கிறார். அந்தக் கதையை நாம் கேட்கிறோம். அந்தக் கதைக்குள் வரும் மனிதர்களும் சம்பவங்களும்தான் படத்தின் உலகம். அதனால் சூரி, நிவின் பாலி, அஞ்சலி உள்ளிட்ட கதாபாத்திரங்களுடன் ரயிலும், ஒரு எலியும், ஒரு தீபாவளி இரவும் முக்கியமான இடத்தைப் பிடிக்கின்றன.

ரயில் ஓடவில்லை… ஆனால் ஓடுவது போலத் தெரிய வேண்டும்!

படத்தின் முக்கியமான பகுதி ரயில் பெட்டிக்குள் நடக்கிறது. ஆனால் அந்த ரயில் உண்மையில் ஓடவில்லை. அதனால், பார்வையாளர்களுக்கு ரயில் வேகமாகச் சென்று கொண்டிருக்கிறது என்ற உணர்வை உருவாக்குவதுதான் மிகப்பெரிய சவால்.

இதற்காக ராம் மற்றும் படக்குழுவினர் உண்மையான ரயிலில் பயணம் செய்து ஆய்வு செய்திருக்கிறார்கள். ஒரு ரயில் நிலையத்தில் வெளிச்சம் எப்படி பெட்டிக்குள் விழுகிறது? எதிரே மற்றொரு ரயில் கடந்து செல்லும்போது அதன் வெளிச்சம் எப்படி பிரதிபலிக்கிறது? தெருவிளக்குகள் ஜன்னல் வழியாக எப்படி நகர்கின்றன? தீபாவளி பட்டாசுகளின் வெளிச்சம் ரயிலுக்குள் எப்படி விழுகிறது? என ஒவ்வொன்றையும் நேரடியாகக் கவனித்திருக்கிறார்கள்.

ரயிலின் வேகத்துக்கு ஏற்ப விளக்குகள் நகர வேண்டும் என்பதற்காக டிஜிட்டல் லைட்டுகளுக்கு timer அமைக்கப்பட்டிருக்கிறது. ரயில் வேகமாகச் செல்லும் உணர்வை உருவாக்க காற்றின் வேகமும் திட்டமிட்டு உருவாக்கப்பட்டுள்ளது. ஒரு propeller-ஐ இயக்குவதற்கே பலர் தேவைப்பட்ட நிலையில், இரண்டு propeller-களுக்கு இன்னும் அதிகமான மனித உழைப்பு தேவைப்பட்டிருக்கிறது.

திரையில் சில நொடிகள் மட்டுமே தெரியும் ஒரு காட்சிக்குப் பின்னால் பல மணி நேர உழைப்பு!

Real Train + Set + CGI

ரயில் செட்டுக்குள் எடுக்கப்பட்ட காட்சிகளுக்கு வெளியுலகத்தை உருவாக்குவதும் எளிதானதாக இல்லை. உண்மையான ரயில்கள், பாலங்கள், நிலையங்கள், இரவு நேரக் காட்சிகள் என பல இடங்களில் real plates படமாக்கப்பட்டுள்ளன.

அந்தக் காட்சிகள் பின்னர் செட்டில் எடுக்கப்பட்ட காட்சிகளுடன் இணைக்கப்பட்டு CGI மூலம் முழுமையான காட்சியாக உருவாக்கப்பட்டிருக்கின்றன.

இதோடு முடிந்துவிடவில்லை. ரயிலின் வேகம், காற்று, வெளிச்சம், கேமரா movement, நடிகர்களின் உடல் இயக்கம் என அனைத்தும் ஒன்றோடு ஒன்று பொருந்த வேண்டும். இல்லையென்றால் இரண்டு ரயில் பெட்டிக்குள் நடக்கும் காட்சிகள் ஒரே மாதிரியாகத் தோன்றிவிடும்.

சத்தமும் கதையின் ஒரு பகுதி!

இந்தப் படத்தில் Visual-க்கு இணையாக Sound-க்கும் முக்கியத்துவம் கொடுக்கப்பட்டிருக்கிறது. ரயில் ஓடும் சத்தம் மட்டுமல்லாமல், மலைக்காற்று, பறவைகள், கடல், மழை, இடி, மின்னல் என ஒவ்வொரு சூழலுக்கும் தனித்தனி soundscape உருவாக்கப்பட்டுள்ளது.

அதனால் ‘ஏழு கடல் ஏழு மலை’ படத்தை பெரிய திரையிலும் நல்ல sound system-லும் பார்ப்பதற்காகவே உருவாக்கியிருக்கிறோம் என்கிறார் ராம்.

சூரி, நிவின் பாலி, அஞ்சலி

சூரியைப் பற்றி பேசும் ராம், ‘வெண்ணிலா கபடி குழு’ காலத்திலிருந்தே அவரது நடிப்புத் திறனை கவனித்து வருவதாகக் கூறுகிறார். காமெடியைத் தாண்டி பல்வேறு கதாபாத்திரங்களை ஏற்றுக்கொள்ளக்கூடிய நடிகராக சூரி இருப்பதாகவும், இந்தப் படத்துக்காக அவரது அர்ப்பணிப்பு குறிப்பிடத்தக்கதாக இருந்ததாகவும் அவர் தெரிவிக்கிறார்.

நிவின் பாலியின் கதாபாத்திரம் கடவுளோ, அதிசய சக்தி கொண்ட மனிதரோ அல்ல. “நம்மையும் உங்களையும் போல ஒருத்தர்; ஆனால் சாகாமல் இருக்கிறார்” என்பதே அந்தக் கதாபாத்திரத்தின் அடிப்படை. அந்த நம்பகத்தன்மையை உருவாக்க costume, hair, colour palette என ஒவ்வொரு விஷயமும் கவனமாக வடிவமைக்கப்பட்டுள்ளது.

அஞ்சலியைப் பொறுத்தவரை, கதாபாத்திரத்தின் emotion மற்றும் layers-ஐ மிக வேகமாகப் புரிந்துகொண்டு நடிக்கக்கூடிய நடிகை என்கிறார் ராம். வெளியில் எளிமையாகத் தெரிந்தாலும், நடிப்பில் பல அடுக்குகளை கொண்டுவரும் திறன் அவரிடம் இருப்பதாகவும் குறிப்பிடுகிறார்.

ஒரு படம் அல்ல… பலரின் உழைப்பு

Art direction, costume design, makeup, editing, music, CGI, sound design என பல துறைகளின் உழைப்பில் படம் உருவாகியுள்ளது. படம் முடிந்த பின்னரும் editing தொடர்ந்து மாற்றப்பட்டு, காட்சிகள் பலமுறை மேம்படுத்தப்பட்டுள்ளன.

ஒளிப்பதிவாளர் ஏகாம்பரத்துக்கும் பல்வேறு பரிசோதனைகளைச் செய்ய ராம் இடம் கொடுத்திருக்கிறார். அதிகாலை வெளிச்சத்தில் எடுக்க வேண்டிய காட்சிகள், நள்ளிரவில் candle light-ல் மட்டுமே படமாக்க வேண்டிய காட்சிகள் என ஒவ்வொரு sequence-க்கும் தனித்தனி visual treatment வழங்கப்பட்டுள்ளது.

அதனால், “இந்தப் படத்தின் ஒவ்வொரு sequence-ம் பேசப்படும் sequence-ஆக இருக்கும்” என்ற நம்பிக்கையை ஏகாம்பரம் வெளிப்படுத்துகிறார்.

ஒரு ரயில் பெட்டிக்குள் நடக்கும் கதை என்றாலும், அதன் பின்னால் நூற்றுக்கணக்கான தொழில்நுட்பக் கலைஞர்களின் உழைப்பு இருக்கிறது. ரயில் ஓடவில்லை; ஆனால் அந்த ரயில் ஓடுவதைப் போல பார்வையாளர்களை நம்ப வைக்க படக்குழு செய்திருக்கும் முயற்சிதான் இந்தப் படத்தின் சுவாரஸ்யமான பின்னணி.

– அங்குசம் செய்திப் பிரிவு