காந்திகிராம கிராமிய நிகர்நிலைப் பல்கலைக்கழகத்தில் பொன்விழா ஆண்டு மற்றும் 39-வது பட்டமளிப்பு விழா

By Angusam News On Oct 31, 2026

இந்த வார அங்குசம் இதழ் படிக்க..

காந்திகிராமம், தமிழ்நாடு: காந்திகிராம கிராமிய நிகர்நிலைப் பல்கலைக்கழகத்தின் பொன்விழா ஆண்டு மற்றும் 39-வது பட்டமளிப்பு விழா (30.10.2026) சிறப்பாக நடைபெற்றது. இவ்விழாவில் இந்தியக் குடியரசுத் துணைத் தலைவர் சி.பி. ராதாகிருஷ்ணன் சிறப்பு விருந்தினராகக் கலந்து கொண்டார். தமிழ்நாடு ஆளுநர் ராஜேந்திர விஸ்வநாத் அர்லேகர் அவர்களும் விழாவில் பங்கேற்று சிறப்பித்தார். பல்கலைக்கழக வேந்தர், துணைவேந்தர், பதிவாளர், பேராசிரியர்கள், பணியாளர்கள், பெற்றோர்கள் மற்றும் பட்டம் பெறும் மாணவர்கள் இவ்விழாவில் கலந்து கொண்டனர்.

நிறுவனம் தொடங்கப்பட்டு 70 ஆண்டுகள் நிறைவடைந்துள்ள இத்தருணத்தில், பல்கலைக்கழக அந்தஸ்து பெற்றதன் பொன்விழா ஆண்டும் கொண்டாடப்படுவது குறிப்பிடத்தக்கதாகும். சமூக மாற்றத்திற்கும் கிராமப்புற வளர்ச்சிக்கும் கல்வியை ஒரு வலிமையான கருவியாகப் பயன்படுத்தி, கடந்த ஏழு தசாப்தங்களாக காந்திகிராம நிறுவனம் ஆற்றி வரும் அர்ப்பணிப்புமிக்க பணிகள் இவ்விழாவில் எடுத்துரைக்கப்பட்டன.

திருச்சியிலிருந்து முதல் இன்டர்நேஷனல் ரோட்டரி இயக்குநர்…

பல்கலைக்கழக வேந்தர் டாக்டர் கே.எம். அண்ணாமலை அவர்கள் தமது உரையில், பொன்விழா ஆண்டில் பல்கலைக்கழகம் மதிப்புமிக்க ‘சிறப்பு அந்தஸ்து பெற்ற நிறுவனம்’ (Institute of Eminence) என்ற தகுதியைப் பெறுவதற்கான முயற்சிகளை விரைவில் மேற்கொள்ள உள்ளதாக அறிவித்தார். மேலும், தேசிய கல்விக் கொள்கை 2020-ஐ (NEP 2020) ஏற்றுச் செயல்படுத்துவதன் மூலம், பல்துறைசார் கல்வி, விமர்சனச் சிந்தனை, படைப்பாற்றல் மற்றும் அறநெறி சார்ந்த பண்புகளை மையமாகக் கொண்டு பாடத்திட்டங்கள் மாற்றியமைக்கப்பட்டு வருவதாகக் குறிப்பிட்டார்.

தேசிய மதிப்பீடு மற்றும் அங்கீகாரக் குழுவின் (NAAC) உயரிய A++ தர அங்கீகாரத்தைப் பெற்றுள்ள பல்கலைக்கழகச் சமூகத்திற்குத் தமது பாராட்டுகளைத் தெரிவித்த வேந்தர், கிராமப்புறங்களின் பாரம்பரிய அறிவையும் நவீன அறிவியல் ஆராய்ச்சி மற்றும் தொழில்நுட்பத்தையும் இணைக்கும் வகையில் பேராசிரியர்கள் தொடர்ந்து பணியாற்ற வேண்டும் என்று வலியுறுத்தினார். வளர்ச்சியடைந்த இந்தியாவை உருவாக்குவதற்கு கிராமப்புற மக்களை வெறும் பயனாளிகளாக மட்டும் கருதாமல், அறிவை உருவாக்குபவர்களாகவும் புதிய கண்டுபிடிப்புகளை மேற்கொள்ளும் ஆற்றல் கொண்டவர்களாகவும் அங்கீகரிக்க வேண்டும் என்றும் அவர் வலியுறுத்தினார்.

இவ்விழாவில், ஆன்மிகத் தலைவர் தவத்திரு குன்றக்குடி பொன்னம்பல அடிகளார், சிறந்த விஞ்ஞானி திரு. நம்பி நாராயணன் மற்றும் தமிழறிஞர் பேராசிரியர் சோ.சோ.மீ. சுந்தரம் ஆகியோருக்கு அவர்களின் சிறப்புமிக்க பங்களிப்புகளையும் சமூகத்திற்காக ஆற்றிய அரும்பணிகளையும் பாராட்டி கௌரவ டாக்டர் பட்டங்கள் (Honorary Causa) வழங்கப்பட்டன. மேலும், பட்டம் பெறும் மாணவர்கள், தங்கப் பதக்கங்கள் மற்றும் பல்வேறு விருதுகளைப் பெறும் மாணவர்கள் அனைவருக்கும் வேந்தர் தமது மனமார்ந்த வாழ்த்துகளைத் தெரிவித்தார்.

அங்குசம் குழுமத்துடன் இணைந்து பணியாற்ற வாய்ப்பு.

தமிழ்நாடு ஆளுநர் மாண்புமிகு திரு. ராஜேந்திர விஸ்வநாத் அர்லேகர் அவர்கள் தமது உரையில், மாணவர்கள் நாட்டின் வளர்ச்சிக்கும் தேசக் கட்டமைப்புக்கும் தங்களது பங்களிப்பை வழங்க வேண்டும் என்று கேட்டுக்கொண்டார்.

இந்தியக் குடியரசுத் துணைத் தலைவர் மாண்புமிகு திரு. சி.பி. ராதாகிருஷ்ணன் அவர்கள் தமது பட்டமளிப்பு உரையில், செயற்கை நுண்ணறிவு, காலநிலை மாற்றம் மற்றும் பொருளாதார மாற்றங்கள் எனப் பல்வேறு சவால்களால் உலகம் மாற்றமடைந்து வரும் சூழலில், பட்டம் பெற்று வெளியேறும் மாணவர்கள் தங்களது பொறுப்புகளை உணர்ந்து செயல்பட வேண்டும் என வலியுறுத்தினார். “உங்களது பட்டம் என்பது ஒரு சாதனை மட்டுமல்ல; அது ஒரு பொறுப்புமாகும். உங்கள் முடிவுகளுக்கு நேர்மையை வழிகாட்டியாகக் கொள்ளுங்கள். சமூகத்திற்குச் சேவை செய்வதைத் தனிப்பட்ட வெற்றியிலிருந்து ஒருபோதும் பிரித்துப் பார்க்காதீர்கள்” என்று மாணவர்களுக்கு அறிவுறுத்தினார்.

காந்திகிராம கிராமிய நிகர்நிலைப் பல்கலைக்கழகம் அடுத்த ஐம்பது ஆண்டுகளில் மேலும் பல சாதனைகளைப் படைக்க வேண்டும் என்றும், கல்விசார் சிறப்பையும் மனிதநேயத்தையும், அறிவையும் செயல்பாட்டையும், புதுமையையும் மனித விழுமியங்களையும் ஒருங்கிணைக்கும் எதிர்காலத்திற்குத் தயாரான கல்வி நிறுவனமாகத் திகழ வேண்டும் என்றும் அவர் தமது விருப்பத்தைத் தெரிவித்தார்.