கூட்டணி தர்மத்தை மறந்த காங்கிரஸ் !

அங்குசம் வார இதழின் உறுதுணையாளர்கள்...

விஐடி வேந்தர் மூலம் தவெக-வுக்கு ‘செக்’ வைக்க முயல்வார்களா திமுக-அதிமுக?
தேர்தல் முடிந்து அரங்கேறிய அரசியல் நகர்வுகளில், கூட்டணி தர்மத்தைக் காற்றில் பறக்கவிட்டுவிட்டு, புதியதாக ஆட்சிப் பொறுப்பேற்றுள்ள தமிழக வெற்றிக் கழகம் (தவெக) அரசை நோக்கி ஓடிச்சென்ற காங்கிரஸ் கட்சிக்கு பாடம் புகட்ட திராவிட முன்னேற்றக் கழகத்திற்கு (திமுக) ஒரு மிகச்சிறந்த அரசியல் தருணம் கனிந்திருக்கிறது.
ஒரு கட்சியின் தலைவர் மட்டுமின்றி முன்னாள் முதல்வர் என்ற ரீதியில் கூட எடப்பாடி பழனிச்சாமியை மதிக்காத தவெக தலைமைக்கு அக்கட்சி பாடம் புகட்டவும் சரியான நேரம் இது.
அத்துடன், தவெக பக்கம் உண்மையாகவே எத்தனை பேர் சார்ந்து நிற்கிறார்கள். கூட்டணி தர்மத்தை கடைப்பிடிப்பவர்கள் யார்யார் என்பதை மற்றவர்களுக்கு உணர்த்தவும் திமுக, அதிமுகவுக்கு ஒரு நல்ல வாய்ப்பு கிடைத்திருக்கிறது.
சாதகமான மாநிலங்களவை தேர்தல் களம்: தவெகவுக்கு ஆதரவு தந்த காங்கிரஸ் கட்சிக்கு, இப்போது தனக்கு கிடைக்கவிருந்த ஒரு உறுப்பினர் பதவியை காங்கிரஸுக்கு விட்டுக் கொடுத்திருக்கிறது தவெக. அதையடுத்து காங்கிரஸ் கட்சியைச் சேர்ந்த பிரவீண் சக்கவர்த்தி எளிதில் எம்.பியாகும் வாய்ப்பை பெற்றிருக்கிறார்.
இந்த சூழலில், தவெக-காங்கிரஸ் சார்பில் நிறுத்தப்பட்ட வேட்பாளர் பிரவீண் சக்கரவர்த்தியின் தன்னிச்சையான ‘X’ தளப் பதிவு, தவெக அரசுக்கு வெளியிலிருந்து ஆதரவளிக்கும் இடதுசாரிகளை (CPI & CPI-M) கடும் ஆத்திரமடையச் செய்திருக்கிறது. தர்மசங்கடத்தை ஏற்படுத்தியிருக்கிறது.
நூலிழையில் ஊசலாடும் தவெக அரசு:
சட்டமன்றத்தின் தற்போதைய பலத்தையும், சூழலையும் கூர்ந்து கவனித்தால், தவெக அரசின் பலவீனமும், எதிர்க்கட்சிகள் அதற்கு ஒரு செக்மேட் வைப்பதற்கான வாய்ப்பும் அதிகம் உள்ளது.
ஆளும் கூட்டணி (116 எம்.எல்.ஏக்கள்): தவெக (107), காங்கிரஸ் (5), விசிக (2), ஐயுஎம்எல் (2). தற்போதைய அவையின் பலம் 229 ஆக உள்ளது. (மொத்தமுள்ள உறுப்பினர் 234 தொகுதிகளில் 5 காலியாக உள்ளது)
பெரும்பான்மைக்குத் தேவையான மிகச்சரியான எல்லைக்கோடான 115ஐ விட ஒரே ஒரு இடம் மட்டுமே (116) கூடுதலாக ஆளும்கட்சியிடம் உள்ளது.
வெளியில் இருந்து ஆதரவு (5): எஸ்.பி. வேலுமணி தரப்பு மீண்டும் எடப்பாடி பழனிசாமியுடன் இணைந்ததால், தற்போதைய அரசுக்கு இடதுசாரிகளின் 4 எம்.எல்.ஏக்களும், ஒரு சுயேச்சை எம்.எல்.ஏவும் மட்டுமே வெளியில் இருந்து ஆதரவு (Confidence & Supply) தருகின்றனர்.
வலுவான எதிர்க்கட்சிகள் (108): திமுக தலைமையிலான கூட்டணி 60 இடங்களுடனும் (திமுக 59, தேமுதிக 1), அதிமுக மற்றும் இதர எதிர்க்கட்சிகள் 48 இடங்களுடனும் (அதிமுக 43, பாமக 4, பாஜக 1) மிக வலுவாக இருக்கின்றன.
இடதுசாரிகளின் அதிருப்தியும் கூட்டணிக் குழப்பமும்:

HARINI JEWELLERS TRICHY

கம்யூனிஸ்ட் கட்சிகளின் எவ்வித அனுமதியுமின்றி, அவர்களை ஒரு புதிய கூட்டணியின் அங்கமாகச் சித்தரித்து பிரவீண் சக்கரவர்த்தி வெளியிட்ட பதிவு இடதுசாரிகளின் தன்னாட்சியையும், பாரம்பரியத்தையும் நேரடியாகக் கேள்விக்குள்ளாக்கியுள்ளது. அவர் தவறுக்கு வருந்தினாலும், கம்யூனிஸ்ட் தலைவர்கள் மற்றும் தொண்டர்கள் மத்தியில் சலசலப்பு ஓயவில்லை.
இதனுடன், தவெக அமைச்சரவையில் அங்கம் வகிக்கும் விசிக மற்றும் ஐயுஎம்எல் ஆகிய கட்சிகளும் தார்மீக ரீதியாகப் பெரும் தர்மசங்கடத்தை எதிர்கொள்கின்றன.
அவை தவெக அணிக்கு மாறிவிட்டனவா, திமுக அணியில் இருக்கின்றனவா என்பது உறுதிப்படுத்திக் கொள்ள முடியாத திரிசங்கு நிலையில் உள்ளன.
நீண்டகாலமாக திமுகவுடன் பயணித்துவிட்டு, தவெக அரசு அமைந்ததும் ஆட்சிப் பங்கீட்டிற்குச் சென்ற இக்கட்சிகளுக்குள், பழைய திமுக ஆதரவு நிலைப்பாடு கொண்ட எம்.எல்.ஏக்கள் இன்னமும் இருக்கத்தான் செய்வார்கள்.
பொது வேட்பாளராக விஐடி ஜி. விசுவநாதன்?: இந்த இக்கட்டான அரசியல் சூழலில், காங்கிரஸ் கட்சியின் தற்போதைய தலைமைக்கு அதிர்ச்சி தரும் வகையில், திமுக ஏன் விஐடி வேந்தர் திரு. ஜி. விசுவநாதன் போன்றவர்களை ஒரு “பொது வேட்பாளராக” களம் இறக்கக் கூடாது? என்பதுதான் இப்போதைய கேள்வி.
விஐடி வேந்தர் ஜி. விசுவநாதனை குறிப்பிட்டு சொல்வதற்கு காரணமும் உண்டு. அரசியல் முதிர்ச்சியும், கல்வியாளராகப் பெரும் புகழும் கொண்ட திரு. ஜி. விசுவநாதன், திராவிடக் கொள்கையில் ஆழ்ந்த பிடிப்பு கொண்டவர். மக்களவையில் அவருடைய குரல் திமுக அண்ணா தலைமையில் ஆட்சிக்கு வந்தபோது (1967) இல் திராவிட சித்தாந்தங்களை ஒலிக்கத் தொடங்கியது. 1971-இலும் (கலைஞர் மு.கருணாநிதி ஆட்சியில்) அவர் வந்தவாசி தொகுதியில் இருந்து தேர்வு செய்யப்பட்டதை அடுத்து தொடர்ந்து 10 ஆண்டுகள் நாடாளுமன்ற பணிகளை தமிழகத்துக்காக சிறப்பாக செய்தவர் என்ற முத்திரை உண்டு.
திமுக மற்றும் அதிமுக என இரு துருவக் கட்சிகளாலும் ஒருமனதாக மதிக்கப்படுபவர் ஜி.விஸ்வநாதன். அத்துடன் அனைத்துக் கட்சிகளாலுமே பெரிதும் போற்றப்படுபவர்.
ரகசிய வாக்குப்பதிவின் பலம்: இத்தகைய ஒரு பொது ஆளுமையை திமுக முன்னிறுத்தும்போது, அவரைத் துணிந்து எதிர்க்க முடியாமல் தவெக கூட்டணியில் உள்ள அதிருப்தி எம்.எல்.ஏக்களும், இடதுசாரிகளின் 4 எம்.எல்.ஏக்களும், ஏன் அதிமுகவின் 43 எம்.எல்.ஏக்களும் கூட ரகசிய வாக்குப்பதிவின் மூலம் ஆதரிக்க மிக அதிக வாய்ப்புகள் இருக்கின்றன.
திமுக – அதிமுகவிற்கு கிடைக்கும் அரசியல் லாபம் என்ன?
எதிர்க்கட்சித் தலைவர் எடப்பாடி பழனிசாமியை பொறுத்தவரை, தவெக அரசிற்கு நெருக்கடி கொடுக்கவும், காங்கிரஸின் மாநில அளவிலான செல்வாக்கைக் குறைக்கவும் இந்த உத்தியைத் தனக்குச் சாதகமான ஒரு வாய்ப்பாகவே கருதுவார். அத்துடன் இப்போதைய சூழலில் அணி மாறிச் சென்று திரும்பிய அதிமுக எம்எல்ஏக்களின் உண்மை நிலையை தெரிந்துகொள்ள முடியும்.
59 எம்.எல்.ஏக்களுடன் மிக வலுவான எதிர்க்கட்சியாக இருக்கும் திமுக, இந்த மாஸ்டர் பிளான் மூலம் ஒருசில பலன்களை அறுவடை செய்யவும் முடியும்:
தேர்தலுக்குப் பின் தங்களைக் கைவிட்ட காங்கிரஸிற்கு, “திமுகவின் துணை மற்றும் ஆசி இல்லாமல் தமிழ்நாட்டில் எந்தவொரு அரசியல் நகர்வும் சாத்தியமில்லை” என்ற நிதர்சனத்தை உணர்த்த முடியும்.
சிதறிப்போன பழைய முற்போக்குக் கூட்டணிக் கட்சிகளை மீண்டும் திமுக தன் தலைமைக்குக் கீழ் கொண்டுவர இது ஒரு பாலமாக ஒருவேளை அமையலாம்.
இடதுசாரிகள் மற்றும் அதிருப்தி எம்.எல்.ஏக்களை ஒருங்கிணைப்பதன் மூலம், தவெக அரசின் நூலிழைப் பெரும்பான்மையை அக்கட்சிக்கு உணர்த்த முடியும்.
இரண்டு வாக்குகள் இடம் மாறினால் போதும், அது காங்கிரஸின் துரோக மனப்பான்மைக்கு அளிக்கும் தண்டனையாக மாறிவிடும்.
இன்றைய அரசியலில் எதுவும் நடக்க இதை விட சிறந்த தருணம் வேறு எதுவும் இல்லை.
முன்னாள் முதல்வர் M. K. Stalin (மு.க. ஸ்டாலின்), Udhayanidhi Stalin (உதயநிதி ஸ்டாலின்) , Edappadi K. Palaniswami (எடப்பாடி கே. பழனிச்சாமி) ஆகியோர் இந்த அரசியல் நகர்வை முன்னெடுப்பார்களா?
கேள்விக்கான பதிலை ஆவலோடு தமிழ்நாடு அரசியல்களம் எதிர்நோக்கி காத்திருக்கிறது.

இந்த வார JUNE 3 அங்குசம் இதழில்…

—   ஆர். ராமலிங்கம், மூத்த பத்திரிகையாளர்

திருச்சியில் நவீன மாடூலர் கிச்சன் -உங்கள் வீட்டிலும் | National Modular Kitchen #business #trending